Borgarafundir er góðir, men nógv kundi týtt á, at tað hevði verið betri við einum millumliði millum býráð og borgararnar, tá mál av stórum almennum áhuga verða viðgjørd.

Tað heldur Heðin Mortensen, borgarstjóri í Havn, sum skjýtur upp, at kommunan setir sonevnd borgarating, tá stór mál verða sett á skrá. Á tann hátt kunnu málini gerast greiðari og meiri klár at viðgera áðrenn endalig støða verður tikinn til tey, heldur hann. 

Rógvi Ólavson, sum er samfelagsfrøðingur á Fróðskaparsetrinum, setir spurnartekin við virðið av borgarafundum, tí teir oftani tykjast sum ein táta, eftirsum avgerðin um at seta eina verkætlan í verk, longu er tikin, áðrenn borgarafundurin hevur verið. Hinvegin kundu borgarating, har serfrøði er uppi í, verið ein møguleiki.

Fiskavirkisskipanin
Útreiðslurnar til fiskavirkisskipanina vaksa, hóast arbeiðsloysið hevur verið støðugt minkandi seinastu árini. Stýrið í ALS mælir nú til at stytta tíðarskeiðið, sum fólk kunnu vera í skipanini, úr átta niður í fýra vikur, altso niður í helvt.   

 Fiskavirkisskipanin er ein ískoytisskipan, ið veitir arbeiðsloysisstuðul arbeiðsfólk, ið arbeiða á fiskavirkum. Skipanin er gjørd við tí endamálið, at veita stuðul til tey, ið arbeiða í hesum sektorinum, tí at arbeiðstørvurin er ógvuliga óstøðugur og skiftandi.

Tað vil siga, at fyri at varðveita starvsfólk í hesum ídnaðinum, veitir mann stuðul til tey, tá litið er at gera, og so arbeiða tey sum vanligt, tá tørvurin er størri. 

Men skal hon broytast, strikast ella verða varðveitt í verandi líki? 

Tað spyrja vit Sólvit Nolsø, tingmann fyri Framsókn, Hervør Pálsdóttir, tingkvinna fyri Tjóðveldi, og Jørgen Niclasen, tingmann fyri Fólkaflokkin. 

Luttakarar: Heðin Mortensen, Rógvi Ólavson, Jórun Gaardar, Eyðfinnur Jacobsen, Sólvit Nolsø, Hervør Pálsdóttir og Jørgen Niclasen. 
Gjørt sendingina hava Kári Mikkelsen, Kristinn Vang og Hallur av Rana, sum eisini var redaktørur.