170 milliónir frá vinnuni er pínumarkið

170 milliónir krónur eru pínumarkið fyri, hvussu nógv ber til at taka frá alivinnuni og fiskivinnuni, sigur Jørgen Niclasen.

Í fíggjarlógini næsta ár er roknað við sama tilfeingisgjaldi fyri uppsjóvarfisk sum í ár, 107 milliónir.

Og harafturat skulu fyritøkur í fiskivinnuni og alivinnuni, sum hava eina millión ella meira í skattskyldugari inntøku, fáa eina rættiliga skattahækking næsta ár.

Frá 2011 hevur ein skattur upp á 2,5 prosent verið lagdur á tað, sum verður kallað eyka stórur vinningur í fiskivinnuni og alivinnuni.

Hesin tilfeingis- og loyvisskattur verður hækkaður upp í sjey prosent næsta ár, sambært uppskoti frá Fíggjarmálaráðnum.

Skatturin verður mettur at geva 63 milliónir næsta ár, 45,5 frá alivinnuni og 17,5 frá fiskivinnuni.

Hækkingin úr hálvum triðja prosenti upp í sjey prosent skal geva landskassanum 40 milliónir næsta ár.

Men hetta er eingin varandi loysn, legði landsstýrismaðurin í fíggjarmálum dent á, tá hann kunngjørdi fíggjarlógaruppskotið mánadagin.

Ein loysn skal finnast fyri fiskivinnuna eftir 1.januar í 2018, tá galdandi veiðiloyvi fara út gildi, segði hann.