Sparingar raka tænastur til landbúnaðin

Av tí at Fiskimálaráðið hevur álagt Búnaðarstovuni at spara eina millión kr. á rakstrarjáttanini til almennar royndir og ráðgeving í 2014 og í 2015, hevur Búnaðarstovan tikið avgerð um niðurleggja tríggjar tænastuveitingar, sum Búnaðarstovan hevur veitt til landbúnaðin, serliga mjólkneytafjósini.

Tænasturnar eru ísáing, neytaeftirlit og beinleiðis ráðgeving, serliga í samband við fóðring av neytum grundað á neytaeftirlit, stráfóðurprøvatøkur, jørðprøvatøkur og aðrar skrásetingar.

Trý fólk hava fingið ætlanarskriv um uppsøgn galdandi frá 1. november at rokna, skrivar Búnaðarstovan á heimasíðuni.

Tað eru serliga mjólkarfjósini, sum verða rakt av sparingunum.

Meginfelag Búnaðarmanna, MBM, sum er felagið hjá mjólkarbóndunum og Búnaðarstovan samskifta í løtuni um, hvussu hesar tænastur í framtíðini skulu fáðast at virka, so at fjósini framhaldandi fáa neyðugar tænastur.

Búnaðarstovan fer nú at tillaga seg karmarnar og kunna samstarvspartar, skrivar Búnaðarstovan.