Noreg og ES útseta makrelsamráðingar

Tvílandasamráðingarnar millum Noreg og ES um makrelfiskiskapin næsta ár, sum skuldu vera í Bergen í næstui viku, eru útsettar.

Týsdagin hittust norski fiskimálaráðharrin, Elisabeth Aspaker, og Maria Damanaki, ES-fiskivinnukommisserur í Brússel, og á tí fundinum legði norski fiskimálaráðharrin eitt ítøkiligt uppskot fyri ES-kommisserin, sum skal fáa gongd aftur á strandalandasamráðingarnar, skrivar enskmælta norska tíðindatænastan, The Nordic Page.

Langt millum partarnar

Greitt verður ikki nærri frá, hvat stendur í uppskotinum, men eftir ynski frá ES, eru ætlaðu tvílandasamráðingarnar millum Noreg og ES, sum skuldu vera í Bergen í næstu viku, útsettar.

Í síðstu viku hittust strandalondini til samráðingar í Írlandi, og tá staðfest varð, at langt er eftir á mál, løgdu partarnir fundin niður fyribils.

Men norski fiskimálaráðharrin sigur við blaðið Dagens Næringsliv, at hon ikki væntar, at partarnir koma á mál við samráðingunum fyri jól.