Inntøkur frá sjónvarpslýsingum til privatar miðlar

Ein partur av inntøkunum frá sjónvarpslýsingunum í Kringvarpinum skulu latast til privatu miðlarnar sum stuðul.

Tað ætlar Bjørn Kalsø, landsstýrismaður í mentamálum, sum arbeiðir við at broyta kringvarpslógina.

Ætlanirnar koma fram í einum skrivi, sum Bjørn Kalsø sendi fíggjarnevndini í síðsta mánaði í sambandi við viðgerðina av fíggjarlógini næsta ár.

Áðrenn fíggjarnevndin skrivaði álitið, vildi hon hava landsstýrismannin at greiða skrivliga frá ymiskum viðurskiftum. Ein spurningur snýr seg um, hvørjar ætlanir eru við kringvarpsgjaldinum næsta ár.

Sleppa undan MVG

Bjørn Kalsø skrivar í svarinum, at arbeitt verður við at gera broytingaruppskot til kringvarpslógina, har millum annað kringvarpsgjaldið skal verða undantikið MVG.

Harumframt verða lýsingarmøguleikarnir hjá Kringvarpinum broyttir, og stuðul verður veittur privatu miðlunum frá inntøkunum av lýsingum í almenna sjónvarpinum.