Danmark og Grønland ósamd um at útvinna uran

Tvídráttur er millum Grønland og Danmark um grønlendsku ætlanirnar at útvinna uran úr grønlendsku undirgrundini.

Tað var greitt eftir fundin í gjár millum grønlendsku landsstýrisforkvinnuna, Alequ Hammond, og danska forsætisráðharran, Helle Thorning-Schmidt.

Báðar vóru kortini samdar um, at partarnar fara at koma til eina semju einaferð í ár.

Neyðugt við samstarvsavtalu

- Tað er greitt, at uran er eitt serligt ráevni, og tí er neyðugt við eini samstarvsavtalu millum londini, sigur Helle Thorning-Schmidt. Hon leggur samstundis dent á, at spurningurin kemur undir verju-, uttanríkis- og trygdarpolitikkin, sum Danmark hevur ábyrgdina av.

Aleqa Hammond gjørdi greitt, at tað ikki er danska stjórnin sum skal gera av, hvat Grønland skal gera á økinum.

Grønland hevur avgerðarrættin

Í oktober í fjør bað grønlendska landsstýrið danska advokatfelagið Lett greina málið um uranið, og niðurstøðan var, at Grønland einsamalt kann gera av, hvussu farast skal fram, so leingi sum uranið skal nýtast til friðarlig endamál.