Atlantsflog veksur og Bakkafrost minkar

Áhugin fyri partabrøvunum í Atlantic Airways var framvegis stórur í keypsskálanum í Keypmannahavn í gjár.

Og kursurin var 200 ella beint oman fyri 200 í øllum 43 handlunum í gjár.

Besti kursur í gjár var 207,5. Størstu handlar í gjár vóru 900 partabrøv fyri kursin 200,5.

Kursurin á partabrøvunum í Atlantic Airways hækkaði meira enn 40 prosent í Keypmannahavn í somu løtu, tað frættist, at Atlantic Airways ætlar at keypa aftur triðingin av partabrøvunum, sum varð einskildur í november 2007, fyri kurs 210.

Í Íslandi er tó framvegis lítil áhugi fyri at eiga í føroyska flogfelagnum.

Í Reykjavík var bara ein partabrævahandil mánadagin, 100 partabrøv fyri kurs 144, sum er eitt vet lægri enn kursurin var har, áðrenn tíðindini komu um at keypa einskilda triðingin aftur.

Í gjár skifti einki partabræv í Atlantic Airways eigara í keypsskálanum í Reykjavík.

Tíðindi um partafeløg, sum eru skrásett í keypsskálum, ávirka ofta kursin á partabrøvunum uppeftir ella niðureftir.

Fyrradagin, tá tíðindi bórust um ILA virus í einum alibrúki hjá Bakkafrosti, lækkaði kursurin á partabrævinum í keypsskálanum í Oslo 4,6 prosent og í gjár lækkaði hann 1,41 prosent.