Havnin hóttir løgtingið

Tórshavnar kommuna góðtekur ikki, at innkomuvegurin til Havnina ikki verður tikin við, nú semja er um at gera bæði Skálafjarðartunnilin og Sandoyartunnilin.

Í skrivi til løgtingið, vísir Heðin Mortensen, borgarstjóri á, at støðan hjá kommununi er greið.

Tí um fá ár stendur Skúladepilin í Marknagili liðugur.

Tað fer at økja munandi um ferðsluna í vesturbýnum, og tí er neyðugt, at fyrsta byggistig av innkomuvegnum røkkur vestur í Marknagil, haðani kommunan er sinnað at gera sambindingarveg frá innkomuvegnum oman til Marknagilsvegin, tætt við Skúladepilin.

Neyðugt við innkomuvegi

- Nú innkomuvegurin enn einaferð tykist vera skumpaður til viks í upplegginum til polittisku semjuna í løgtinginum um Sands- og Skálafjarðartunnilin, fer Tórshavnar kommuna at gera vart við tørvin at fáa hetta sera átrokandi málið loyst.

Tórshavnar kommuna fer við skrivinum at senda løgtinginum ein greiðan boðskap, so eingin ivi er um, hvørja støðu kommunan hevur í málinum. Kommunan fer ikki at góðkenna, at tunlarnir koma upp í Suðurstreymoy og viðføra munandi størri ferðslutrýst á kommunala veganetið í Tórshavnar kommunu, uttan so, at innkomuvegurin til Havnar samstundis verður gjørdur, soleiðis at takast kann ímóti øktu ferðsluni. Og hann skal gerast á ein att, sum Tórshavnar Býráð kann góðkenna.

Løgtingið má taka málið í álvara

Hann sigur seg vóna, at løgtingið tekur boðini í álvara, tí einki er vunnið við tunlum fyri milliarda upphæddir, fyri at koma skjótari til Havnar, um langar bíðirøðir koma at standa við Norðrara Ringveg, ella Marknagilsvegin fyri at sleppa inn í býin. Tí tað verður úrslitið, um innkomuvegurin ikki verður gjørdur, áðrenn ella seinast samstundis sum tunlarnir lata upp, skrivar Heðin Mortensen.