ÍF steypavinnari

ÍF vann sannførandi á SÍ í finaluni. Dysturin endaði 3-0. Settúrslitini: 25-21, 25-14, 25-19.

Fyrsta settið byrjaði við at liðini skiftust um at fáa stig. Men tá settið var hálvrunnið var Jón Joensen hjá SÍ óheppin, tá hann fekk skaða í fótin. Hetta tók broddin av álopsspælinum hjá SÍ.

Jón Joensen kom ongantíð inn aftur og í øðrum setti bleiv tað upp aftur verri hjá SÍ, tí tá bleiv Rajko Petrovic skaddur, og hann kom heldur ikki inn aftur.

SÍ stríddist tó víðari, og var leingi á odda í triðja setti. ÍF hevði tó væl størri dygdir á sínum liði, og tá veruliga stóð á, megnaðu teir eisini at venda triðja setti.

Hetta er annað árið á rað, at ÍF er steypavinnari hjá monnum.

Boban Ilic bleiv valdur til dagsins leikara hjá ÍF, og Ólavur Jensen varð valdur til besta leikara hjá SÍ.