Lars Olsen væntar torføran dyst móti Gibraltar

- Hetta er ein gyltur møguleiki hjá Gibraltar at prógva, at teir kunnu spæla við í altjóða fótbólti, og tí vænti vit harða mótstøðu leygarkvøldið, segði Lars Olsen, landsliðsvenjari, millum annað á tíðindafundinum, sum varð hildin eitt gott samdøgur áðrenn landsdystin millum Gibraltar og Føroyar.

Á Gibraltar gera tey nógv burtur úr landsdystinum, og fyriskipararnir vænta, at tað verður útselt.

Mótstøðuliðið hjá føroyska landsliðnum leygarkvøldið er nýggjast limurin í UEFA. 

Fyrsti altjóða dysturin hjá Gibraltar varð spældur í november í fjør móti Slovakia. Dysturin endaði 0-0.

- Úrslitið ímóti Slovakia vísir, at Gibraltar hevur eitt gott landslið, og nú teir skulu spæla fyrsta dyst á heimavølli síðan limaskapin í UEFA, vilja teir gera alt fyri at vísa sínum áskoðarum, at tað var rætt at fara upp í altjóða fótbólt. Men vit eru væl fyrireikaðir, so eg vænti ein harðan og tættan dyst, segði Lars Olsen, við gibraltesisku fjølmiðlarnar.

Fyri júst trimum árum síðani spældu Gibraltar og Føroyar venjingardyst á Victoria Stadion. Gibraltar vann 3-0.

Dysturin millum Gibraltar og Føroyar leygarkvøldið verður eisini hesaferð á Victoria Stadion. Byrjað verður klokkan 19.00