Fólkaheilsuráðið: Tørvur er á kunning um garnatálg

<p>Eiga vit at eta garnatálg afturvið tí mesta, nú garnatálg seinastu dagarnar av summum hevur verið kallað ein sunn kelda til feitt?</p>

<p>Fólkaheilsuráðið heldur, at tørvur er á almennari kunning, tí fólk kanska ivast í, hvørt smør ella olivinolja eru best ella minst skaðilig fyri heilsuna.</p>

<p><strong>SÍ EISINI <a href="http://kvf.fo/netvarp/sv/2014/03/11/fmigarnatalginnsldvpal">FM í garnatálg</a></strong></p>

<p>Í <a href="http://www.folkaheilsa.fo/tad+sunna+feittid.html" target="_blank">skrivi frá ráðnum stendur</a>, at nýggjastu kostráðini mæla til at minka um nøgdina av mettaðum feitti í tí matinum, vit eta.</p>

<p>Harafturat verður eggjað til at eta meiri av einkultómettaðum feitti, sum vit millum annað fáa úr olivenolju, rapsolju, heslinøtum, mandlum og øðrum.</p>

<p><strong>Ov nógv ósunt feitt etið í grannalondum</strong></p>

<p>Kanningar úr okkara grannalondum vísa, at sum heild eta fólk ov nógv mettað feitt. Mettaða feittið fáa vit millum annað frá smøri, róma og feitum oksakjøti.</p>

<p>Fólkaheilsuráðið sigur í almennum skrivi í dag, at ov nógv mettað feitt ger vandan størri fyri at fáa ov nógv kolesterol í blóðið og fyri at fáa hjarta- og æðrasjúku.</p>

<p><strong>SÍ EISINI <a href="http://kvf.fo/netvarp/ms/2014/03/14/myndir-21-slog-av-garnatalgi-kappast... 21 sløg av garnatálg kappast um FM heitið</a></strong></p>

<p>Ráðið heldur, at vit í størstan mun eiga at halda okkum til einkultómettað feitt og omega-3 feitt. Omega-3 feitt kemur millum annað úr fiskaolju og feitum fiski.</p>

<p>Men Fólkaheilsuráðið hevur tó ein lítlan ugga til tey, sum elska garnatálg. Ráðið sigur, at vit við góðari samvitsku kunnu eta garnatálg av og á, - serliga um vit annars minnast til at eta grønmeti, feitan fisk og tað góða feittið úr eitt nú nøtum, olivenolju og avokado.</p>