Ikki full semja í býráðnum í Havn

<p>Tað kom skilliga til sjóndar á eyka býráðsfundinum í síðstu viku. Og borgarstjórin er í øðini eftir fundin. Marin Katrina Frýdal í Tjóðveldi atkvøddi ikki fyri einum uppskoti um at raðfesta íløgurnar hjá kommununi av nýggjum.</p>

<p>Ætlanin at dagføra Sundsvegin, tí fjarhitarør skulu leggjast oman í Gundadal, er útsett. Býráðið samtykti at bíða við teirri iløguni. Men Marin Katrina Frýdal vil hava arbeiðið gjørt nú.</p>

<p>Hon skrivar á sínari heimasíðu, at Tekniska nevnd fyri langari tíð síðani hevur avgjørt, at Sundsvegurin skal dagførast fyri at kunna taka ímóti alsamt vaksandi ferðsluni til høvuðsstaðin.</p>

<p><strong>Peningur fluttur til aðrar íløgur</strong></p>

<p>Samstundis skulu fyrireikingar gerast til at leggja fjarhitarør í vegin. Ætlanin at gera alt um somu leið, dagføra Sundsvegin og fáa fjarhitan oman í býin.</p>

<p>Men tær fimm milliónirnar, sum skuldu brúkast til hetta arbeiðið, eru fluttar til aðrar íløgur.</p>

<p>Á eyka býráðsfundinum í síðstu viku fekk Marin Katrina Frýdal ført í gerðarbókina, at hon mælir til at útvega eitt fakligt tilmæli frá teknisku umsitingini hjá býráðnum, Fjarhitafelagnum og SEV um at dagføra Sundsvegin og at fáa fjarhitan oman í Gundadal.</p>

<p><strong>Borgarstjóri: - Óskikkur má halda uppat</strong></p>

<p>Heðin Mortensen, borgarstjóri, sigur, at Marin Katrina Frýdal hevur sett seg uttan fyri samstarvið í býráðnum um íløgurnar í 2014.</p>

<p>- Óskikkurin, at býráðslimir ikki atkvøða fyri so stórum málum, tá málini koma til endaliga viðgerð, má halda uppat.</p>

<p>Ikki at taka undir við einum so týðandi máli sum ein íløguætlan er, er tað sama sum ikki at taka undir við teimum ætlanum, sum verða lagdar fyri árið, sigur Heðin Mortensen, borgarstjóri. Henda gongdin sleppur ikki at halda fram, sigur hann.</p>

<p><strong>Má fáa avleiðingar</strong></p>

<p>Setir ein seg uttanfyri, tá endalig atkvøðugreiðslu er, og enntá fer út í fjølmiðlarnar at heita á býráðslimir um at taka borgarstjóran av ræði, so fylgir ein ikki okkara mannagongdum.</p>

<p>Og tað skal ikki halda fram uttan avleiðingar, sigur Heðin Mortensen, borgarstjóri í Tórshavnar kommununu, á heimasíðuni hjá kommununi. Íløguætlanin hjá Tórshavnar kommunu fyri 2014 er 185 mió. kr.</p>

<p>Ætlanin er at byggja millum annað dagsstovn í Kollafirði, judo- og borðtennishøll í Gundadali, fótbóltsvøll í Hoyvík og ítróttarøki á Argjum. musikkskúla og brúgv um Sandá.</p>