Ukraina: Verjumálaráðharrin frákoyrdur

Lóggávutingið í Ukraina hevur í dag koyrt virkandi verjumálaráðharran, Igor Tenjukh, frá fyri handfaringina av kreppuni á Krim

Næstseinasta sunnudag atkvøddi meirlutin av fólkinum á Krim fyri at lima seg inn í Russland. Í dag varð ukrainski bverjumálaráðharrin koyrdur frá fyri handfaringina av kreppuni á Krim

Karolina Thostrup

Brynhild Thomsen

25.03.2014 - 15:26

Verjumálaráðharrin í Ukraina er koyrdur frá, nú Krim er innlimað í Russland. Hetta skriva Ritzau og Reuters.

Tað er lóggávutingið í Ukraina, sum í dag hevur koyrt virkandi verjumálaráðharran, Igor Tenjukh, frá fyri handfaringina av kreppuni á Krim.

228 tinglimir av 450 atkvøddu fyri at koyra verjumálaráðharran frá. Síðani samtykti tingið at seta general Mykhailo Koval í starvið sum nýggjur virkandi verjumálaráðharri.

Ukraina boðaði í gjár frá, at landið tekur alt sítt hervald av Krim-hálvoynni, og í einari yvirlýsing stendur, at ætlanir eru gjørdar fyri, hvat gerast skal við fólk á Krim, sum verða trýst frá húsi og heimi av russiska valdinum.

Tað er nú skjótt ein mánaði síðan, at russiski forsetin, Vladimir Putin, fekk heimild frá russiska tjóðartinginum at brúka vald í Ukraina, skriva Ritzau og Reuters.