FMR ivasamt um alment partafelag

Fíggjarmálaráðið ivast í ætlanini at gera Ferðaráðið til alment partafelag, men hetta er frægari enn onkur onnur óroynd skipan, heldur ráðið

Støðan hjá umskipaða Ferðaráðnum verður mest at líkna við hana hjá P/F Fiskaaling, ið fær studning úr landskassanum, men hvørki hevur vinnuligt endamál ella virksemi, sigur Fíggjarmálaráðið, sum tó tekur undir við ætlanini

Høgni Djurhuus

Brynhild Thomsen

26.03.2014 - 11:00

Hóast sakligar grundgevingar eru ímóti, stuðlar Fíggjarmálaráðið ætlanini hjá Vinnumálaráðnum at umskipa Ferðaráðið til almenna partafelagið Visit Faroe Islands.

Heldur tað enn onkra óroynda serskipan, sum hevði ført til óvissu um tilknýtið til landsroknskapin ella fíggjarlógina, heldur ráðið.

Men Fíggjarmálaráðið er ikki fegið um ætlanina at gera Ferðaráðið til alment partafelag.

Tað skilst á hoyringarskrivinum frá Fíggjarmálaráðnum um lógaruppskotið um Visit Faroe Islands.

Fíggjarmálaráðið heldur, at virksemið hjá Ferðaráðnum er av slíkum slagi, at tað kann rekast við játtan í fíggjarlógini.

Tað er ikki neyðugt at stovna alment partafelag.

Støðan hjá umskipaða Ferðaráðnum verður mest at líkna við støðuna hjá P/f Fiskaaling, sum fær stuðul til raksturin úr landskassanum, men ikki hevur vinnuligt endamál ella virksemi, sigur Fíggjarmálráðið.