Fyrsta stigið í fyrstu HM-undankappingini

A-landsliðið hjá kvinnum hevur í kvøld skrivað søgu á Tórsvølli. Tær hava í kvøld spælt javnt í móti Bosnia-Hersigovina

Rannvá Andreasen

05.04.2014 - 22:45

Bosnia Hersigovina kom á odda í 25 min. Màlið skoraði Melisa Hasanbegovic, eftir rótut spæl í egnum brotsteigi.
Rannvá Andreasen royndi at skalla bóltin burtur eftir royndina frá Melisu Hasanbegovic, men dómarin metti at bólturin hevði verið innanfyri mállinjuna.
Føroyska liðið mótmælti ikki avgerðina hjá dómarinum, sum í kvøld var Simona Ghisletta úr Sveis.

Í 78 min fekk Eyðvør Klakstein ein bólt úr vinstru síðu. Eyðvør stóð ódekkað uttanfyri brotsteigin hjá Bosnia-Hersigovina, og gjørdi ikki mætari enn at smekka bóltin í málið til 1-1.
Eitt sera gott mál frá ungu Eyðvør Klakstein.
Hetta var eisini fyrsta málið hjá henni á A-landsliðnum.

Teir síðstu minuttirnir vóru merktir av at bæði liðini royndu at fáa øll trý stigini í hús.
Liðskiparin Malena Josephsen var sera fegin um fyrsta stigið í fyrstu HM-undankappingini í søguni hjá føroyska landsliðnum hjá kvinnum. Hon var alt í alt nøgd við at fáa ta eina stigið, men sær longu fram til komandi dyst tann 10 apríl í móti Norður Írlandi.

Føroyska liðið:
Randi Wardum (M), Sigrun Kristiansen, Malena Josephsen (L), Liljan av Fløtum Petersen, Fríðrunn Danielsen, Ansy Sevdal, Oddrún Danielsen, Laila Pætursdóttir ( 73 min Lìv Arge), Olga Kristina Hansen, Ásla Johannesen (67 min Eyðvør Klakstein), Rannvá Andreasen.

Komandi dystur er hósdagin 10 apríl kl 19 á Tórsvølli.