Føroyskir fyritíðarpensjónistar verri fyri

Fyritíðarpensjónistar í Føroyum hava ikki somu treytir sum borgarar í Norðurlondum annars hava, tá flutt verður millum londini.

Sambært norðurlendska sáttmálanum um sosiala trygd frá 2003, hava fyritíðarpensjónistar, sum flyta úr einum Norðurlandi til annað Norðurland ella til eitt land í ES, rætt til at fáa ta pensjón, tey fingu í landinum, tey flyta úr.

Men hetta er ikki galdandi í ríkisfelagsskapinum, tí har er ein donsk lóg frá 1995 oman fyri norðurlendska sáttmálan.

Tað svaraði Annika Olsen, landsstýriskvinnu, Kára P. Højgaard, løgtingsmanni, síðst í desember í fjør.

Og sama svar hevur Høgni Hoydal, løgtingsmaður, fingið nú í mai í ár.

Annika Olsen svaraði Kára P. Højgaard, at hon var sinnað at tosa við danska ráðharran í almannamálum um eina avtalu millum Føroyar og Danmark um rættindini hjá fyritíðarpensjónistum.

Nú svarar hon Høgna Hoydali, at hon hevur biðið um fund við Manu Sareen, ráðharra.