Miseydnaða landsroyndin kostar 350.000 kr.

<p>Landsroyndirnar vórðu ikki avlýstar, hóast ikki bar til at brúka teldurnar í fyrra umfari. Tær verða í staðin fyri gjørdar við penni og pappíri nú í vikuni, 20., 21. og 22. mai.</p>

<p>Hetta ger, at uppgávurnar skulu prentast, berast út og rættast. Væntandi fer tað at kosta okkurt um 350.000 kr., sigur Bjørn Kalsø, landsstýrismaður í skúlamálum, í svari til Gunnvør Balle, løgtingskvinnu.</p>

<p>Fyri at menna og gera talgildu landsroyndirnar í skúlaárinum 2013-2014 hevur Mentamálaráðið brúkt okkurt um 430.000 kr.</p>

<p><strong>Framvegis ætlan at hava talgildar landsroyndir</strong></p>

<p>Talgildu royndirnar miseydnaðust, tí sambært frágreiðing frá veitara byrjaði ein dagføring av ambætaranum, sum hýsti forritinum hjá Mentamálaráðnum, samstundis sum landsroyndirnar byrjaðu.</p>

<p>Hetta gjørdi, at skipanin varð overvað, helt uppat at virka, og sambandið við telduskipanina hvarv. Tí vórðu royndirnar avlýstar. Bjørn Kalsø sigur, at ætlanin er framvegis, at landsroyndirnar skulu vera talgildar næsta ár.</p>

<p>Tá verður skipanin royndarkoyrd í fleiri umførum á brúkarastøði fyri at tryggja, at skipanin riggar, tá landsroyndirnar verða hildnar, sigur landsstýrismaðurin.</p>