Vil greina evropeiskt fíggjareftirlit í Føroyum

Ein arbeiðsbólkur hjá Føroyum, Grønlandi og Danmark eigur at greina eftirlitið við fíggjarstovnunum, nú ætlanin er at stovna felags evropeiskt fíggjareftirlit fyri londini, sum hava evruna sum gjaldoyra.

Jørgen Niclasen, landsstýrismaður í fíggjarmálum, hevur biðið løgmann nevna hetta á ríkisfundinum, sum verður í Føroyum 17.juni.

Neyðugt at kanna fyrimunir og vansar

Jørgen Niclasen sigur, at neyðugt er at kanna, hvørjir vansar og hvørjir fyrimunir eru fyri Føroyar, um eftirlitið við fíggjarstovnum í Føroyum verður uttan fyri felags evropeiska fíggjareftirlitið, og hvat hendir, um Føroyar onkursvegna eru við í felags evropeiska fíggjareftirlitinum.

Í Danmark er longu arbeiðsbólkur settur við embætisfólkum úr ymiskum ráðharrastovum at kanna fyrimunir og vansar við luttøku í styrkta bankasamstarvinum.

Hvussu verður í Føroyum?

Um Danmark vil vera við í styrkta evropeiska bankasamstarvinum, má greiða samstundis fáast á, hvussu eftirlitið við peningastovnum skal vera í Føroyum og Grønlandi, sum ikki eru í ES.

Nú hevur danska fíggjareftirlitið eftirlit við føroysku og grønlendsku peningastovnunum.