Føroyska sildakvotan verður 40.000 tons

Føroyska sildakvotan í ár verður 9,56 prosent, 40.000 tons. 

Talið er tó ikki váttað enn. 

9,56 prosent eru 4,40 prosentstig meira enn ES og hini strandarlondini upprunaliga vildu geva Føroyum, tí býtislykilin frá 2007 sigur, at Føroyar eiga 5,16 prosent.

Jacob Vestergaard, landsstýrismaður, og Kaj Leo Holm Johannesen, løgmaður, ráðførdu seg við Uttanlandsnevndina hjá løgtinginum í gjár. 

Jacob Vestergaard hevur onga viðmerking til tíðindini. Landsstýrisfundur verður klokkan 11, og eftir tann fundin verður kunnað um avtaluna, sigur landsstýrismaðurin í fiskvinnumálum

Í trúnaði

Enn er tó eingin fráboðan komin frá landsstýrinum um sildakvotuna í 2014 ella um, at ES tekur boykottið móti Føroyum aftur og Føroyar taka gerðarrættarmálini móti ES aftur. Og ráðførslan í Uttanlandsnevndini var í trúnaði.

Við Vágaportalin sigur Jacob Vestergaard, at landsstýrisfundur verður um sildakvotuna kl.11.00 í dag. 

Men Maria Damanaki, ES-fiskivinnukommisserur, kunngjørdi, sum hon segði: við gleði, í gjár, at ein avtala við Føroyar var komin undir land: Hon segði millum annað, at nú sleppa ES-skip í føroyskan sjógv at fiska, og føroysk skip kunnu aftur fiska í ES-sjógvi. Men enn er nógv arbeiði eftir at gera fyri at staðfesta endaliga og fremja avtaluna. 

Annars greiddi Damanaki frá avtaluni, sum var gjørd við Føroyar um sildakvotuna, ES-boykottið og gerðarrættarmálini. Og føroyski sildafiskiskapurin verður nú burðardyggur, segði hon eisini.

Óvist við hinum strandalondunum

Ikki er greitt enn, um hini strandarlondini, Noreg, Ísland og Russland, taka undir við, at Føroyar fáa størri sildakvotu.

Í september fara strandarlondini aftur at samráðast um norðhavssildina og kvoturnar í 2015.