Kanningar krevja eykajáttan

Formansskapurin í løgtinginum noyðist at biðja løgtingið um eykajáttan til tvær kanningar, sum løgtingið hevur sett í gongd.

Formansskapurin samtykti fyri einari viku síðani at biðja um eykajáttan í ár til grein 19 nevndina, sum kannar Eik Grunnin og eftirlitið við grunninum, og til kanningarstjóran, sum kannar lutin hjá Kára P. Højgaard, sum var landsstýrismaður í innlendismálum, og hjá Kaj Leo Holm Johannesen, løgmanni, í ætlanin um privata Eysturoyartunnilin.

Harafturat er neyðugt at keypa nýggja útgerð til løgtingssalin, og til hennara verður eisini søkt um eykajáttan, sæst í gerðarbókini hjá formansskapinum.

Har verður tó ikki upplýst, hvussu nógvar pengar, formansskapurin fer at biðja um í eykajáttan.

Jógvan á Lakjuni, løgtingsformaður, kundi heldur ikki upplýsa talið, tá vit spurdu hann fyrrapartin. 

Løgtingsformaðurin sigur, at neyðugt er longu í ár at fáa tingfólki nýggja útgerð til eitt nú atkvøðugreiðslurnar, tí verandi útgerð er ov svikalig. 

Løgtingið hevur tilboð frá donskum veitara um nýggja tøkniliga útgerð til løgtingsfólk.