Fólkatingsfólk í Føroyanevnd koma til Føroya

Í næstu viku vitjar Føroyanevndin hjá fólkatinginum Føroyar.

Sambært skránni er talan um námsferð fyri at geva nevndarlimunum størri kunnleika um føroysk viðurskifti. 

Føroyanevndin kemur sunnukvøldið og fer av stað aftur seinnapartin hósdagin. 

Mánadagin vitjar nevndin alibrúkið hjá Luna í Sørvági og smoltstøðina við Fútaklett og eftir tað verður farið til Mykines. 

Mánakvøldið eru donsk embætisfólk í Føroyum og aðrir danir, sum búgva her, boðin at hitta nevndina.  

Politikkur og vinna

Týsdagin er politikkurin á skránni. Føroyanevndin skal hitta løgmann og Uttanlandsnevndina hjá løgtinginum.

Harafturat fær nevndin kunning um tiltakið "Vit velja Føroyar", korini hjá fjølmiðlunum og ferðavinnuna. 

Mikudagin vitjar Føroyanevndin Atlantic Supply Base í Runavík, Havsbrún, Pelagos og Bergfrost í Fuglafirði og eisini verður kunnað um oljuvinnuna í Føroyum.    

Og fyrrapartin hósdagin fer nevndin í ráðhúsið í Havn, skúlan við Løgmannabreyt og fimleikahøllina í Gundadali.

29 tingfólk eru í Føroyanevndini hjá fólkatinginum. Men øll koma ikki til Føroya. Í ferðalagnum vera 11 tingfólk umframt Sjúrð Skaale, sum er formaður í nevndini, og Edmund Joensen, sum er næstformaður. Harafturat koma trý starvsfólk hjá fólkatinginum. 

Føroyaferðin hjá Føroyanevndini er mett at kosta 261.000 kr.