Karen Hækkerup kemur á vitjan

Danski løgmálaráðharrin, Karen  Hækkerup, kemur nú til Føroya at vitja donsku løgregluna her.

Tað er siður, at løgmálaráðharrin eisini vitjar politidømini uttan fyri Danmark - t.e. í Grønlandi og í Føroyum, og Karen Hækkerup hevur ikki verið í Føroyum, síðani hon tók við í danska Løgmálaráðnum 12. desember í fjør.

Hitta løgregluna og løgmann

Umframt at hava fund við politileiðsluna at umrøða bygnaðarbroytingarnar, sum eru gjørdar, og onnur politifaklig mál, skal løgmálaráðharrin vitja Kriminalforsorgina, rættin og Ríkisumboðið. Løgmálaráðharrin skal eisini hava fund við Kaj Leo Holm Johannesen, løgmann.

Karen Hækkerup kemur til Føroya mikudagin, og hon fer av landinum aftur fríggjamorgunin.