Hava rakt við makrel í Eysturgrønlandi

Grønlendska havstovan hevur funnið makrel í Eysturgrønlandi, skrivar Sermitsiaq.

Grønlendska havstovan hevur eins og føroyska, íslendska og norska havstovan gjørt yvirlitstrolingar í summar. Sambært Sermitsiaq er tað komið óvart á grønlendsku lívfrøðingarnar, at makrelur er sunnan fyri Hvarvið, og at gýtandi makrelur er funnin í grønlendskum sjógvi.
   
Yvirlitstrolingarnar vóru lidnar fyri góðari viku síðani, sigur grønlendska havstovan í tíðindaskrivi. Sambært Sermitsiaq vænta lívfrøðingar eisini at finna makrel vestanfyri, men enn er økið ikki kannað. 

Finnur Fríði kannaði fyrr í summar í føroyskum sjógvi.

Minni makrelur og sild

Kanningarnar vístu, at nakað minni var til av makreli og sild í øllum økinum samanborið við í fjør. Mest var at fáa norðanfyri, meðan væl minni var til sunnanfyri og vestanfyri. Trolað varð í vatnskorpuni, har makrelurin vanliga gongur hesa tíðina. Nógv sild var eisini uppi í veiðini, og viðhvørt var eisini nakað av heilt smáum svartkjafti at fáa.

Úrslitini frá øllum yvirlitstrolingum skulu leggjast fram á einum fundi í ICES í Keypmannahavn , sum byrjar 26 august.