Uttanríkisráðharrin finst at Russlandsferð løgmans

"Handelspartnere eller nyttige idioter" og "Færøsk hjælp til Putin."

Tað eru yvirskriftirnar í tveimum greinum hjá danska blaðnum Berlingske Tidende um Russlandsferð løgmans.

Og danski uttanríkisráðharrin, Martin Lidegaard, leggur seg í aðrari greininini út í ferðina hjá løgmanni.

"Eg rokni við,  at Føroyar  vita,  at ES væntar, at triðjalond ikki gera sær dælt av støðuni, orsakað av russisku tiltølunum móti ES, skrivar Martin Lidegaard í einum telduposti til danska blaðið Berlingske Tidende.

"Vit hava øll ábyrgd at tryggja, at nøkur ikki gera sær dælt av støðuni, tá onnur missa marknað, orsakað av tiltøkunum, og eg havi álit á, at Føroyar finna rættu javnvágina í málinum," skrivar danski uttanríkisráðharrin til Berlingske.

Biðja um frágreiðing

Vinstriflokkurin biður donsku stjórina um at geva Fólkatinginum eina frágreiðing um málið, skrivar Berlingske.

"Tað sigur seg sjálvt, at boðini til Russlands eru sterkari, tá allar demokratiskar tjóðir standa saman um atfinningarnar. Eg fari til at mæla stjórini til at halda fram við samskiftinum við Føroyar, og at stjórnin bjóðar flokkunum í Fólkatinginum til eina kunning um málið, skrivar Finn Thranum, sum er framsøgurmaður hjá Vinstra, í einum telduposti til Berlingske.

Danski Fólkaflokkurin stuðlar

Men Danski Fólkaflokkurin tekur undir við Føroyum

"Føroyar eru ikki limir í ES, so tað er í lagi. Eisini skal havast í huga, at ES í mong ár hevur noytt órímiligar kvotur niður yvir føroyingar, og at Føroyar hava verið raktar av tiltøkum úr ES. So, Føroyar skylda avgjørt ikki ES nakað, sigur, Søren Espersen, sum er framsøgufólk í Føroya-málum hjá Danska Fólkaflokkinum, við Berlingske.