Gjørt ónáðir hjá Sea Shepherd

Løgreglan hevur úr at gera við at loysa ósemjur millum føroyingar og Sea Shepherd.

Um vikuskiftið hava ungdómar í Suðuroynni tikið nummarspjøldur av bilunum hjá Sea Shepherd, og tveitt hesar á sjógv. Málið bleiv meldað til løgregluna, og hevur løgreglan tosað við ungdómarnar, sum hava víst løgregluni, hvar nummarspjøldrini blivu tveitt á sjógv.

Løgreglan hevur fleiri mál, sum snúgva seg um ósemjur millum  føroyingar og Sea Shepherd.

- Talan er fyri tað mesta um smá-kriminalitet, sigur Peter Thaysen, chefpolitiinspektørur, við Kringvarpið. Okkurt meir álvarsamt mál er tó, har talan er um hóttanir, sigur Peter Thaysen. 

Nógv tey flestu málini, sum verða meldað til løgregluni, koma frá Sea Shepherd, sum meldar føroyingar fyri at gera ónáðir móti sær.