Vilja nú verða hoyrd um sítt egna fakøki

Námsfrøðingar kenna seg forfjónaðar, tí aðrir fakbólkar avgera, hvat skal henda í dagsstovnunum. 

Fimta hvørt barn dugir ikki at lesa. Og hvørt ár verða 70 børn send í Psykiatriska depilin til greiningar ella til viðgerðar. 

Nú má dagsstovnaøkið takast í álvara, sigur Maud Wang Hansen, forkvinna í Pedagogfelagnum, í áheitan á landsstýrismannin í mentamálum.

Pedagogfelagið er til reiðar at hjálpa til við at venda gongdini, sigur forkvinnan. 

Vil hava dagstovnaráð

Síðani hendan samgongan kom, hevur Pedagogfelagið heitt á landsstýrismannin um at fáa skipað eitt virkið dagstovnaráð. Eitt dagstovnaráð, sum kann veita landsstýrismanninum ta hjálp og ráðgeving, sum dagstovnalógin ásetir. 

Talan er um viðurskifti hjá øllum børnum í Føroyum aldrinum null til sjey ár, sum eru í dagstovni. 

- Enn hava vit ikki frætt frá landsstýrismanninum, hvørjar ætlanir hansara eru á hesum økinum. 

Eingin ivi skal vera um, at dagstovnaøkinum tørvar politiskan áhuga, kanska ongantíð so nógv sum nú, sigur Maud Wang Hansen, forkvinna í Pedagogfelagnum. 

Valt í 2011

Í apríl í fjør segði Bjørn Kalsø, landsstýrismaður, í løgtinginum, at í 2011 varð Dagstovnaráðið sett, tó uttan lógarbundna heimild. 

Sama árið, í 2011, varð Fólkaskúlaráðið, sum hevur verið virkið fyrr og hevur sína heimild í fólkaskúlalógini, afturvalt. 

Ætlanin var, at hesi bæði ráðini skuldu vera ráðgevarar hjá Mentamálaráðnum. Fólkaskúlaráðið hevur verið virkið hesa tíðina, men Dagstovnaráðið hevur verið nærum óvirkið. 

Mentamálaráðið vil hava eitt virkið Dagstovnaráð. Men kommunufeløgini vóru ikki nøgd við leistin, Dagstovnaráðið hevur verið skipað eftir. 

Í tí sambandi var samskifti millum Mentamálaráðið og kommunufeløgini við tí endamáli at fáa Dagstovnaráðið at virka, men enn er tíverri ikki komið á mál, segði landsstýrismaðurin í løgtinginum í fjør vár.