Nýggjar útrokningar:fólkaskúlin kostar meira í ár

Av tí at skúlaárið og fíggjarárið ikki fylgjast er torført at meta um, hvussu nógvar pengar, fólkaskúlin skal hava í fíggjarlógini.

Í eykajáttanarlógini, sum kom í løgtingið fyrr í vikuni, verður biðið um 3,1 milliónir krónur afturat til fólkaskúlan.

Skúlarnir boða frá fyribils næmingatølum 1.februar fyri komandi skúlaárið. Fyribils tímajáttan verður latin skúlunum sambært hesum tølum.

1.september fær Mentamálaráðið endaligu næmingatølini. Og ikki fyrr enn tá ber til at rokna út endaliga, hvussu nógvar tímar, skúlarnir skulu hava.

Eisini onnur viðurskifti gera, at illa ber til at raka beint, tá talið hjá fólkaskúlanum skal setast í fíggjarlógina, sigur Mentamálaráðið.  

Nýggjar útrokningar

Nýggjar útrokningar vísa, at fólkaskúlin hevur brúk fyri fleiri pengum í ár.

Mentamálaráðið hevur tó funnið 3,1 milliónir á sínum egnu kontum, so hækkaða játtanin til fólkaskúlan kostar ikki landskassanum meira. 

Frískúlin við Hoyvíkstjørn er givin. Teir 43 næmingarnir eru farnir í aðrar skúlar í Tórshavnar kommunu, og har sparir landið 600.000 kr.

Annars verður játtanin til ES-granskingarskránna 300.000 kr. minni, játtanin til lestrarstuðul minkar 1,4 mió. kr., og játtanin til lestrarlán minkar 800.000 kr.