Færri viðmerkingar um trygdina á skipum

Fleiri kanningar vórðu gjørdar á føroyskum skipum í fremmandari havn í triðja ársfjórðingi í ár enn í fjør, 70 í ár og 63 í fjør.

Men viðmerkingarnar um trygdina eru færri í ár. Tær vóru 143 í fjør og eru 102 í ár. 

Einki skip er afturhildið í ár, tí trygdin var ikki í lagi. Í fjør vórðu tvey skip undir føroyskum flaggi afturhildin í útlendskari havn, upplýsir Sjóvinnustýrið.  

Av tí at so nógvar viðmerkingar um frávik ella brek vóru í fjør, setti Sjóvinnustýrið sær fyri at fáa tølini niður. Og tað tykist at fara at eydnast, tá árið 2014 er liðugt, sambært tíðindaskrivi hjá Sjóvinnustýrinum.

Serliga brunatrygdin

Føroysk skip fáa nógv flestar viðmerkingar um brunatrygdina, tær vóru 18 í triðja ársfjorðingi.

12 viðmerkingar vóru um trygdarútgerð og 12 um trygdina í sambandi við navigering, so sum fullfíggjaðar siglingarætlanir og dagførd sjókort.

Paris MoU, felagsskapurin, sum ger ófráboðað eftirlit á skipum, tá tey koma í havn hjá limalondunum, kannar í løtuni skeivar skrásetingar av arbeiðstíðum og hvílitíðum.