Leita framvegis eftir kavbáti í skergarðinum

Leitanin eftir kavbátinum í svenska skergarðinum heldur fram sætta dagin á rað.

Nú er annað russisk skip á veg til Svøríkis, skrivar svenska blaðið Expressen.

Talan er eftir øllum at døma um granskingarskipið, Professor Logachev, sum hevur "hangar" til smærri kavbátar.

Horvið á radaranum

Skipið er í nátt fleiri ferðir horvið á radaranum, men hollendsk krígsskip sóu Professor Logachev, tá skipið var miðskeiðis í Eystursjónum.

Russiska oljutangaskipið, NC Concord, sum í fleiri dagar hevur ligið út fyri Stokkholmi, og sum hildið verður er móðurskip hjá kavbátinum, hevur samstundis sett kós móti Russlandi.

Villeiðandi slóð

Lektarin við svenska verjuakademiið, Tomas Ries, sigur, at hetta kann verða villeiðandi slóð frá russiskari síðu.

- Eg meti framvegis, at NC Concord hevur borið seg løgið at og kann helst setast í samband við virksemið undir vatnskorpuni í skergarðinum við Stokkhólm. At NC Concorde nú siglir aftur til Russlands, kann væl verða fráleiðingar-atgerð, sum russarar duga so væl, sigur Tomas Ries, og leggur aftrat, hetta merkir helst samstundis, at Professor Logachev yvirtekur leiklutin sum móðurskip, ella hevur eina aðra uppgávu í hesum sambandi.