Stórur áhugi at keypa streym úr Íslandi

Tað verður í fyrsta lagi í 2022, at Føroyar ella onnur lond kunnu keypa streym úr Íslandi.

Íslendski elveitarin, Landsvirkjun, hevði aðalfund í gjár. 

Har varð upplýst, at møguleikin at leggja kaðal úr Íslandi til onnur lond, sum vilja keypa streym úr Íslandi, verður kannaður. Kannað verður fyrst, um keyparar eru í øðrum londum. Kanningarnar taka tvey til trý ár, og skal kaðal leggjast, tekur tað arbeiðið fimm ár. Tí verður tað ikki fyrr enn í fyrsta lagi í 2022, at Ísland kann útflyta ravmagn.

Tað veldst eisini um loyvi fæst frá íslendskum myndugleikum. Men áhugin uttanlands er stórur, verður sagt.

Hava kannað møguleikar í Føroyum

Í Føroyum hevur av og á nógvu seinastu árini verið tosað um at keypa streym úr Íslandi. Onkrar kanningar eru gjørdar í tí sambandi. Og síðst í oktober 2012 gjørdi Johan Dahl, landsstýrismaður í orkumálum, avtalu við íslendskan starvsbróður sín um at kanna møguleikan fyri at leggja elkaðal millum Ísland og Føroyar.    

Við allari sínari vatnorku ger Ísland bíligan streym. Og sum veðurlagsbroytingarnar eru nú, fara jøklarnir at tiðna næstu 100 til 200 árini, og við øllum tí vatninum ber til at fáa nógv meira vatnorku.     

Hugskotið um elkaðal millum Ísland og onnur lond er okkurt um 35 ára gamalt. Og síðani 1995 hevur tøkniliga borið til at fremja eina slíka ætlan. 

Tað fer eisini at bera til at brúka kaðalin til at flyta streym úr øðrum londum umvegis Føroyar til Íslands.