Almannamálaráðið flytur næsta ár

Tað verður ikki fyrr enn í september næsta ár, at Almannamálaráðið flytur í Tinganes.

Almannamálaráðið skal flyta í Leigubúðina í Tinganesi. Men Leigubúðin verður høvuðsumvæld, og flutt verður ikki, fyrr enn tað arbeiðið er liðugt, sigur Eyðun Mohr Hansen, aðalstjóri í Almannamálaráðnum.

Almannamálaráðið skal í hølini, har sum Innlendismálaráðið var. 

Halda til á Eirargarði

Almannamálaráðið hevur tvær tær ovastu hæddirnar í skrivstovubygninginum í Eirargarði 2.

Tað var í summar, at Annika Olsen, landsstýriskvinna, avgjørdi, at aðalráð hennara skal flyta. Og tað er ein politisk avgerð, segði hon við Útvarpið.

Almannamálaráðið hevur ikki biðið um pengar í fíggjarlógini til flytingina. Flytingin verður goldin av pengunum, sum ráðið fær til raksturin.

Næsta ár vera 16 ársverk í Almannamálaráðnum.