Evstu ábyrgd av Sjúkraflutningstænastuni

Landssjúkrahúsið hevur tilnevnt Hans Jákup Simonsen liðlækna í Sjúkraflutningstænastuni í sjúkrahúsverkinum.

Liðlæknin hevur evstu fakligu ábyrgd av Sjúkraflutningstænastuni. Hann hevur sostatt myndugleika á øllum trimum sjúkrahúsum, og skal tryggja eina eins góða sjúkraflutningtænastu um alt landið. 

Sjúkraflutningstænastan fevnir um sjúkrabilar og tyrluflúgving, og skal tæna teimum, sum hava tørv á bráðfeingis hjálp orsakað av óhappi ella sjúku, føðing ella annað. 

Hans Jákup Simonsen skal hava umsjón við tænastuni og hevur ábyrgdina av, at starvsfólkini fáa góðkenda útbúgving, og at hon verður dagførd á hvørjum ári. 

Liðlæknin skal eisini góðkenna, at viðgerðartólini í sjúkrabilunum lúka altjóða krøv, og at tey eru eins, soleiðis at øll sjúkraflutningsstarvsfólk kenna tólini uttan mun til hvør sjúkrabilur er á staðnum.

Hans Jákup Simonsen hevur sonevnda præhospitala útbúgving, og hann verður liðlækni í trý ár.