Fyritíðarpensjón verður til fólkapensjón

Fólkapensjón kemur í staðin fyri fyritíðarpensjón og avlamisveitingar, tá tann, sum fær pengarnar, gerst 67. Og tað hendir, hóast fólk ikki søkja um tað.

Tað hevur Kærunevndin í almanna- og heilsumálum staðfest. Og Almannaverkið fekk samstundis viðhald í sínari avgerð.

Kært varð um, at miðal fyritíðarpensjón varð broytt til fólkapensjón, tá kærarin fylti 67 ár.  

Hetta gjørdi, at inntøkan hjá tí, sum kærdi, minkaði. 

Fær 521 kr. minni um mánaðin 

Hann fekk 9.295 kr. um mánaðin í fyritíðarpensjón, men 5.844 kr. í fólkapensjón. Harafturat fær hann 2.930 kr. frá Samhaldsfasta, so inntøkan minkar 521 kr. um mánaðin.

Almannaverkið boðaði frá, at fólkapensjónistar fáa ikki fyritíðarpensjón. 

Hetta varð kært. 

Men kærunevndin gevur Almannaverkinum rætt, tí Almannaverkið hevur gjørt eftir lógini, sum eisini sigur, at fólk, sum fylla 67, fáa fólkapensjón í staðin fyri fyritíðarpensjón uttan umsókn. 

Almannaverkið sigur, at kærarin kann søkja um persónliga viðbót afturat fólkapensjónini, um so er, at hann ikki kann klára seg við tí, hann fær.