Putin: Nato er størsta hóttanin

Viðurskiftini millum Russland og Vesturheimin hava verið kaldlig seinasta árið, og nú er líkt til, at tey eru kølnað uppaftur meira.

Russiski forsetin, Vladimir Putin, skrivaði í gjár undir eina nýggja hernaðarliga doktrin, sum sigur, at Nato-felagsskapurin er størsta hóttanin móti landsins trygd, skrivar tíðindastovan AP.

Í doktrinini verður dentur lagdur á, at tað serliga er Nato-herdubbingin nærindis russiska markinum, sum elvir til ótryggleika. At vesturheimurin hevur sent fleiri herfólk til baltisku londini er leggja politiskt og strategiskt trýst a Russland, sigur Putin.

Tryggja limalondini

Men Nato svarar aftur og sigur, at tað er fyri at tryggja limalondini móti russiskum ágangi, at felagsskapurin hevur dubbað seg. 

- Vit verja okkum og halda altjóða lóg. Russisku átøkini í Ukraina bróta altjoða lóg og ávirka trygdina í Evropa, sigur Nato-talskvinnan, Oana Lungescu.

Í nýggju doktrinini verður hildið fast við, at Russland kann nýta atomvápn, verður tað álopið við atomvápnum ella hópoyðingarvápnum.