Vilja hava meiri útnorðursamstarv

<p>- Samstarva vit meiri á fiskivinnuøkinum, eitt nú við at marknaðarføra fiskavørur og ferðavinnu samstundis, eru góðir møguleikar at gera stóra framstig, sigur Sigurður Ingi Jóhannsson við grønlendska blaðið <a href="http://sermitsiaq.ag/islandsk-minister-sammen-kan-goere-store-fremskridt" target="_blank">Sermitsiaq</a>.</p>

<p>Hann sigur, at íslendingar hava havt góðar royndir av at marknaðarføra fisk og ferðavinnu í senn. Útnorðurráðið hevur seinastu dagarnar havt fund í Grønlandi.</p>

<p>Íslendski búskaparfrøðingurin, Heiður Már Guðjónsson, segði á eini ráðstevnu í sambandi við útnorðurráðsfundin, at stór framgongd hevur verið í íslendska útflutninginum, síðani Ísland menti sítt egna flutningskervi.</p>

<p>Sigurður Ingi Jóhannsson sigur, at íslendingar nýta allar flogleiðir millum Ísland, Evropa og USA at flyta fiskavørur og ferðafólk, og tað eiga føroyingar og grønlendingar eisini at gera, heldur íslendski fiskimálaráðharrin.</p>