Framtíðar elorkuskipanin grundast á varandi orku

Tilmæli eru nú gjørd um framtíðar elorkuskipanina í Føroyum.
Vinnumálaráðið setti í 2012 arbeiðsbólk at gera virkisætlan og tilmæli um framtíðar elorkuskipan í Føroyum, sum í nógv størri mun enn í dag skal grundast á varandi orku. Í arbeiðsbólkinum eru umboð fyri Vinnumálaráðið, SEV, Jarðfeingi og Dansk Energi. 
Bólkurin nevnir í virkisætlanini 26 tilmæli um átøk og 7 ítøkilig átøk innan framleiðslu, orkugoymslu, nýtslu og elskipan. - Arbeiðsbólkurin hevur tikið økini við, sum mest sannlíkt koma at hava stóran týdning næstu 10 árini. 

Oljurikin orkuverk hava í mong ár verið bulurin í føroyskari elframleiðslu, og tað fara tey framvegis at vera í nøkur ár, sigur arbeiðsbólkurin. 
Tó kunnu uppsetingar av fleiri vindmyllum, meiri vatnorka og vind/vatn-pumpuskipanir vera við til at spara nógva olju. 
Uppseting av fleiri vindmyllum setir nógv nýggj krøv til elskipanina, og enn er óvist, hvussu nógv av samlaða framleiðslumáttinum kann koma frá vindmyllum. 
Tá ið stórur partur av framleiðslumáttinum kemur frá vindmyllum, fer til tíðir at vera yvirframleiðsla av vindorku, sum ikki kann nýtast, sokallað vindspill. Hetta merkir, at tað vera tíðarbil, har vindmyllurnar ikki kunnu koyra við fullum mátti, til dømis um náttina, tá ið nýtslan er lág.

Arbeiðsbólkurin umrøður eisini undirsjóvarkaðal millum Føroyar og umheimin - t.d. Ísland og Hetland. Ein slíkur kaðal fer at minka um tørvin á olju, men hann kann ikki geva neyðugar veitingar, sum elskipanin hevur tørv á. Tí má framvegis vera fult backup, tí eitt kaðalbrot merkir, at sambandið kann vera burtur í fleiri mánaðir. 
Onnur lond gera stórar íløgur í umleggingar til varandi orku.

Arbeiðsbólkurin sigur, at føroyska politiska skipanin noyðist at viðurkenna, at skal umleggingin til varandi orku gerast veruleiki, krevur hetta stórar íløgur í framleiðsluna - og átøk, sum kunnu flyta nýtsluna frá fossilum brennievnum til varandi orkukeldur, stendur millum annað í tilmælinum um framtíðar el-orkuskipanina í Føroyum.