Andstøðupolitikkari dripin í Russlandi

Nemtsov gekk saman við eini kvinnu túr á Bolsjoj Moskvo-retskij-brúnni nærindis Kreml um hálvgum ellivutíðina okkara tíð í gjárkvøldið, tá sjey-átta skot vórðu latin av í ryggin á honum. Gerningsmenninir sótu í einum bili.

Boris Nemtsov er kendur fyri at vera ein av harðastu politisku mótstøðumonnunum móti russiska forsetanum, Vladimir Putin. 

Kanna drápið

Sambært tíðindastovuni, Tass, hevur Putin givið boð um, at drápið skal kannast. 

Talsmaðurin hjá Putin sigur, at Putin fordømir drápið, og sigur, at nógv bendir á, at hetta er leigudráp, og at tað er rein provokation.

Kvinnan, sum fygldist við Nemtsov, er í nátt avhoyrd. 

Væl fyriskipað dráp

Atsóknin hendir bara fáar dagar undan stórari mótmælisgongu móti stýrinum hjá Putin. Í seinasta bloggi sínum mælti Boris Nemtsov øllum í andstøðuni um at stuðla mótmælistiltakinum í Moskva í morgin.

Russiskir rannsakarar halda, at drápið er væl fyriskipað. Teir kann nú, um endamálið við drápinum er at skapa óstøðug viðurskiti í politisku støðuni í Russlandi, sigur russiska tíðindastovan, Interfax.

Rannsakararnir meta eisini, at víðgongdir islamistar kunnu hava framt álopið ella kann tað hava samband við stóru mótmælisgonguna í morgin.