Pál Joensen gull í Fraklandi

Pál Joensen vann í dag gull í kappingini Meeting Open Méditerranée í Marseille. 

Pál vann A-finaluni í 400 m. frísvimjing. Tíðin var 3:50.22. 

Nummar tvey varð Yannick Agnel úr Fraklandi við tíðini 3:51.06, og nummar trý varð týski Jacob Heldtmann við tíðini 3:52.04.

Svimjing.com skrivar, at tað var ein spennandi finala.

Svimjing.com skrivar, at taktikkurin hjá Páli var at koyra so hart á sum hann kundi allan vegin, so at Agnel ikki átti nakað til endaspurtin.

At vinna á Yannick Agnel er flott, tí hann er ikki hvør sum helst í altjóða svimjing.

Agnel hevur vunnið fleiri OL-heiðursmerki, og hann eigur heimsmetið á 400 m. teininum (stuttgeil).

Tíðin hjá Páli var hansara fimtbesta nakrantíð, og tann besta í hesi grein síðani OL í London 2012.

Føroyska metið hjá Páli er 3:46.84 frá OL úttøkustevnuni á Danish Open í mars 2012.

Pál skal í morgin royna seg í 1500 metra frísvimjing, og har verður mett, at hann eisini hevur góðan møguleika at vinna gull.