Breið semja um pensiónsnýskipanina kann gerast

Tað hevur leingi verið ivasamt, um pensjónsnýskipanin kemur í løgtingið fyri valið, tí semja fæst ikki millum andstøðu og samgongu um broytingarnar, sum eru neyðugar, tí fleiri og fleiri fólkapensjónistar vera í framtíðini og færri á arbeiðsmarknaðinum fyri hvønn pensjónistin.

Nú eru løgtingsfólk farin at tosa um ein annan møguleika. Hann er at gera eitt uppskot, sum breið semja fæst um, liðugt fyri valið, men ikki leggja tað fyri løgtingið fyrr enn eftir valið.

Vit fingu ikki orð Anniku Olsen fyrrapartin fyri at vita, um hetta er ein leistur, sum hon tekur undir við. Men í tinginum i gjár segði landsstýriskvinnan í almannamálum, at tað ber til at avgreiða pensjónsnýskipanina í hesum valskeiðnum, er vilji til tess.

Varnir at koma við uppskotum

Av tí at løgtingsval verður í ár, eru politikarar ikki so hugaðir at koma við uppskotum, sum veljarunum ikki dámar, fyri valið.

Sum ein løgtingsmaður sigur, so er eingin trupulleiki at fáa breiðar semjur um tær populeru avgerðirnar, men verri er við teimum ópopuleru avgerðunum, nú valið nærkast.

Annika Olsen, landsstýriskvinna, ætlaði at hava kalla pensjónsbólkin til fundar í hesari vikuni, men tann fundurin verður ikki.