Fólkaskúlaráðið framvegis ikki mannað

Tað er í andsøgn við fólkaskúlalógina, tá landsstýrismaðurin í skúlamálum ikki hevur mannað fólkaskúlaráðið. 

Tað sigur Herálvur Jacobsen, formaður í Føroya Lærarafelag, við skúlablaðið. 

Lærarafelagið hevur fleiri ferðir heitt á Bjørn Kalsø, landsstýrismann, um at manna ráðið, men enn er hetta ikki gjørt. 

- Landsstýrismaðurin fer tí sera lætt um lógina, sigur Herálvur Jacobsen, tí í lógini stendur, at landsstýrismaður skal seta fólkaskúlaráðið, sigur hann. 

-Og tí er eingin nóg góð umbering hjá landsstýrismanninum, sigur formaðurin í Lærarafelagnum.

Hann vísir á, at fólkaskúlaráðið hevur sera stóran týdning fyri fólkaskúlan, tí ráðið skal seta út í kortið, hvønn skúlapoltik vit vilja hava, sigur Herálvur Jacobsen við skúlablaðið.