BankNordik sigur 20 fólkum úr starvi í Danmark

BankNordik í Danmark fremur bygnaðartillaging og sigur 20 fólkum úr starvi. Harumframt verða fimm fulltíðarstørv spard burtur við nátúrligari frágongd og leysum størvum, sum ikki verða sett aftur.

Sparingin verður umleið 17 milliónir krónur um árið. Útreiðslurnar er umleið 13 milliónir kr., sum ávirka roknskapin annan ársfjórðing í ár. Fráfaringaravtalur eru gjørdar við starvsfólkini. 

BankNordik væntar, at  úrslitið í ár verður óbroytt, millum 200 og 240 milliónir kr.

- Bankavirksemi er vaksandi, og vit fáa dagliga nýggj viðskiftafólk. Men samstundis er kappingin um viðskiftafólkini herd almikið, sigur Janus Petersen, forstjóri í BankNordik.

- Fyri at kunna bjóða bestu treytirnar á marknaðinum er neyðugt at reka virksemi sera skynsamt, og við styrkta kappingarføri bankans halda vit fram at menna virksemi bankans, sigur hann.