Frágreiðing: ÍSF er eftirbátur

Nógvar ítróttargreinar í Føroyum hava vánaligar umstøður. Og hjá ÍSF er støðan lítið mætari.

Tað sigur ÍSF í frágreiðingini "Íðkandi og ítróttaranlegg í Føroyum."  

ÍSF heitir enn eina ferð á landsstýrið og løgtingið um at seta av pengar til nýtt høvuðssæti hjá ÍSF.

Eftirbátur

Samanbera vit hølisumstøðurnar hjá ÍSF við umstøðurnar á Tórsvølli hjá størsta sersambandinum, Fótbóltssambandinum, sæst alt fyri eitt, at ÍSF er vorðið eftirbátur, stendur í frágreiðingini.

Annars eru umstøðurnar hjá so at siga øllum ítróttargreinum ikki nóg góðar, sambært ÍSF. 

Í Føroyum er eingin bogaskjótibreyt, eingin altjóða golfvøllur, eingin judohøll og eingin borðtennishøll.

Triði hvør íðkar ítrótt

Sambært frágreiðingini er triði hvør føroyingur ítróttarfólk.

15 túsund og 633 fólk í Føroyum íðka ítrótt, sigur ÍSF.

Nógv best umtóktu ítróttargreinarnar eru fótbóltur, hondbóltur og fimleikur. 4.733 fólk sparka, 3.617 spæla handbólt og 2.068 gera fimleik.