Royna semju um Skúlan við Løgmannabreyt

Hóast fimm ár eru liðin, síðani Skúlin við Løgmannabreyt í Hoyvík varð liðugur, er fíggjarligi parturin av byggingini ikki liðugur enn.

Ósemja er framvegis um góðar 7,4 mió. kr. í eykarokningum fyri byggingina.

Men í morgin fara advokatarnir hjá byggifelagnum Búsetri og Tórshavnar kommunu at royna at finna semju um pengarnar.

Eydnast tað ikki, fer ein gerðarrættur at avgera trætuna um tey 17 krøvini, sum kommunan hevur fingið.

Kravdu 11 milliónir

Kravið var fyrst 11 milliónir og 150.000 kr., og tá er meirvirðisgjaldið við, sum Tórshavnar kommuna fekk frá Búsetri. Búsetur fekk eykarokningar frá sínum undirveitarum, sum Búsetur sendi kommununi.

Gerðarrætturin hevur longu avgjørt, at triðingurin av kravinum var fallin fyri tíðarfreistini, fyrningarfreistini. So tí triðinginum sleppur kommunan undan.  

Eftir eru so góðar 7,4 mió. kr., sum partarnir í morgin fara at royna at finna semju um.