Nýskipan miðsavnar fiskivinnuna í Danmark

Síðani politikararnir fyri tíggju árum síðani góvu donsku fiskivinnuni kvoturnar fyri einki at selja, er vinnan savnað á fáum hondum, og stór afturgongd hevur verið á útróðrarplássum.

Tað sigur Jeppe Høst á Saxo-stovninum, sum hevur skrivað eina ph.d-ritgerð um gongdina í donsku fiskivinnuni, við dr.dk

Talið á fiskiskipum niður í helvt

Samstundis, sum vinnan verður miðsavnað, fækka tænastuvinnurnar á útróðrarplássunum, sigur Jeppe Høst sambært DR.

Brúk er ikki longur fyri eitt nú smiðjum og uppboðssølum innan fiskivinnuna í Danmark.

Í 2006 vóru umleið 1100 fiskiskip í vinnu, men í 2013 vóru bert 616 eftir. Meinast rakt eru útróðrarpláss í Eysturjútlandi, Sælandi og í smáu oyggjunum.

Lógin verður ikki hildin

Síðani lógin varð broytt, hevur gongdin verið, at stór skip fáa kvoturnar, og tey landa í eitt nú Skagen, Hirtshals og Thyborøn.

Reglan sigur, at einstaklingar kunnu bert eiga avmarkaðar kvotur. Men lógin verður ikki hildin, og í veruleikanum eru tað onnur, sum eiga kvoturnar.

Kvoturnar verða síðani leigaðar teimum, ið eiga stóru skipini, kemur fram í einari sjónvarpssending, DR hevur gjørt um donsku fiskivinnuna.