Vinnan vil vera við

- Undir valstríðnum søgdu allir teir stóru flokkarnir, at vinnan skuldi vera við til at gera eina fiskivinnunýskipan, og tað høvdu vit eisini væntað.

Tað sigur Annfinn Olsen, formaður í Føroya Reiðarafelag, nú Aksel V. Johannesen, samráðingarleiðari, hevur boðað frá, at ætlanin er at seta ein arbeiðsbólk at koma við tilmæli um, hvussu fiskivinnan kann skipast av nýggjum.

Í arbeiðsbólkinum skulu sita fakfeløg og umboð fyri vinnuna. 

Tilmælið frá arbeiðsbólkinum skal verða grundarlagið undir uppskotinum, sum ætlanin er at leggja fyri tingið á ólavsøku, sigur Aksel V. Johannesen.

Annfinn Olsen sigur, at Reiðarafelagið hevur ikki verið í sambandi við flokkarnar, sum samráðast um nýtt landsstýri, men hevur bert fylgt við í málinum í miðlunum.

Annfinn Olsen sigur, at tey seks punktini í arbeiðssetningurin hjá arbeiðsbólkinum verða rættiliga avgerandi fyri, hvørjir møguleikar verða, tí Aksel V. Johannesen hevur sagt, at arbeiðast skal eftir øðrum meginreglum enn gjørt verður nú.

Nú eru bert tvey ár, til galdandi fiskivinnuskipan fer úr gildi í 2018.

Reiðarafelagið hevur fleiri ferðir gjørt vart við, at hetta er ov stutt tíð at laga seg til eina nýggja skipan.