Fáa nú beinleiðis atgongd til upplýsingar á Taks

Taks bjóðar nú eina nýggja sjálvgreiðslu á netinum.

Borgaragluggin, sum nýggja tænastan eitur, gevur fólki beinleiðis atgongd til sínar upplýsingar hjá Taks, umframt lættari atgongd at avgreiða ymisk viðurskifti við Taks. 

Sambært Taks verður Borgaragluggin við tíðini høvuðsmiðilin í samskiftinum millum Taks og borgaran. Á tann hátt verður avgreiðslan talgild og verður skjótari og lættari.

Fleiri møguleikar
 
Fleiri møguleikar eru í Borgaraglugganum. Her ber til at lata inn sjálvuppgávu og kapitalvinnings-sjálvuppgávu; broyta skattauppgerðir; søkja um ferðastuðul, rentustuðul og stuðul til dupult húsarhald og so framvegis.

Eisini sæst eitt yvirlit yvir løn, eftirløn, frítíðarløn, umframt yvirlit yvir ogn og skuld. 

Somuleiðis eru grundupplýsingar av ymsum slag at finna á Borgaraglugganum. Eitt nú bústaður, samskiftisupplýsingar, kontuupplýsingar og upplýsingar um børn.

Til ber at sleppa inn á Borgaragluggan við Mínlykil.