DMI: Nú kemur fyrsti kavin

Um vikuskiftið fellir hitin so mikið, at tann fyrsti vátakavin í heyst væntandi kemur niður. Fyrsti kavin kemur kanska mánadagin, sambært DMI

Vátaslettingur um vikuskiftið, og tann fyrsta kavan fáa vit mánadagin. Tað eru í øllum førum útlitini í nýggjastu veðurforsøgnini hjá donsku veðurstovuni

Bjarni Mohr

21.10.2015 - 10:02

Fleiri lond í Evropa hava longu fingið tann fyrsta kavan í heyst. Nú er kavin eisini á veg til Føroyar, sambært nýggjastu forsøgnini hjá donsku veðurstovuni.

Um vikuskiftið fer hitin at fella so mikið, at vit kunnu vænta okkum vátasletting sunnunáttina, sambært nýggjastu fimm daga forsøgnini hjá DMI.

Vátaslettingur verður eisini mánanáttina, sambært forsøgnini hjá donsku veðurstovuni. Bæði leygardagin og sunnudagin verðir hitin um tvey til fimm stig.

Kavi mánadagin

Mánadagin fellir hitin enn meira, og tá verður eisini møguleiki fyri at fyrsti kavin í heyst kemur niður, sigur danska veðurstovan.

Mánadagin verður hitin um dagin tvey til fimm stig. Týsnáttina fellir hitin nakað, og verður tá millum frostmarkið og trý hitastig.

Veðurforsagnir, ið strekkja seg fimm dagar fram, skulu kortini vanliga takast við einum ávísum fyrivarni, sambært veðurfrøðingum.