Longur barsil frá nýggjárinum

Tað stendur í uppskotinum, sum Henrik Old, landsstýrismaður, hevur latið løgtinginum. Lógarbroytingin skal sambært uppskotinum koma i gildi á nýggjárinum.

Síðani Barsilsskipanin varð sett á stovn í 2001, hevur verið strembað eftir, at barsilsfarloyvið skal verða eitt ár.

Sambært uppskotinum verður barsilsfarloyvið hjá ættleiðingarforeldrum longt úr 46 vikum upp í 52 vikur, og sostatt er komið á mál hjá ættleiðingarforeldrum.

Pápar kunnu ikki lata mammuni barsilsfarloyvi

Aftrat hesum verður skipanin broytt soleiðis, at tær báðar vikurnar, sum pápin eftir galdandi lóg kann lata mammuni, verða markaðar til pápan.

Tað merkir, at pápin ikki longur kann lata mammuni part av sínum markaða barsilsfarloyvi. Tíðarskeiðið, foreldrini kunnu býta sínámillum, verður longt úr 20 vikum upp í 26 vikur.

At fíggja tær 13,7 milliónir krónurnar, sum broytingin í Barsilsskipanini verður mett at kosta, verður skotið upp hækka gjaldið, sum bæði løntakarar og arbeiðsgevarar rinda til skipanina 0,09 prosentstig - úr 0,62 prosentum upp í 0,71 prosent.