Ein króna nóg mikið til at stovna partafelag

Skjótt fara íverksetarar at kunna stovna smápartafelag við bara einari krónu í kapitali.

Serliga slagið av smápartafelagi, íverksetarafelag, er ein av nógvum broytingum í lógunum, sum eru galdandi fyri vinnulívið í Føroyum.

Uttanríkis- og Vinnumálaráðið hevur sent ætlaður lógarbroytingarnar til hoyringar.

Betri kappingarføri

Endamálið við broytingunum er at gera føroyskan vinnufelagarætt altjóða kappingarføran, so krøvini í Føroyum ikki eru strangari enn í øðrum londum. 

Tað skal eisini gerast lættari at stovna fyritøkur við avmarkaðari ábyrgd. Millum annað fer kravið um partapenging í vanligum smápartafeløgum úr 80.000 krónum niður í 50.000 krónur.

Eitt annað endamál er at rudda slóð fyri fleiri kvinnum í leiðslunum í størstu fyritøkunum. 

Hesar fyritøkur, tær størstu, fáa eisini álagt at greiða frá í sínum ársfrágreiðingum, um tær hava samfelagsábyrgd, til dømis viðvíkjandi umhvørvi ella mannarættindum. 

Talgilt samskifti

Og landstýrið vil hava heimild til at krevja, at alt viðkomandi skrivligt samskifti millum fyritøkur og myndugleikar verður talgilt, og loyva skattavaldinum at fáa innlit í eigaraupplýsingar í sambandi við handhavapartabrøv, tá eigaraparturin er minni enn fimm prosent. 

Eftir 1.juni næsta ár skal ikki bera til at stovna feløg við avmarkaðari ábyrgd eftir vinnufyritøkulógini. 
Orsøkin er, at hesi feløg líkjast nógv partafeløgum og smápartafeløgum, men tey eru minni gjøgnumskygd og hava færri krøv um kapital og leiðslu.