Fleiri sleppa at lesa á Fróðskaparsetrinum

Mentamálaráðið hevur biðið um seks milliónir krónur afturat til Fróðskaparsetrið, so tað kann taka 310 lesandi næsta ár.

25 pláss eru markað til nýggju útbúgvingina í búskaparfrøði, og 16 fleiri sleppa at lesa sjúkrarøktarfrøði. Fróðskaparsetrið hevur í eina tíð fyrireikað útbúgvingina í búskaparfrøði.

Grundarlag er fyri nýggjari útbúgving

Rigmor Dam, landsstýriskvinna í mentamálum, sigur, at hon hevur raðfest játtanina til Fróðskaparsetrið, so til ber at bjóða búskaparfrøði næsta summar.

Í februar í ár vísti ein kanning, at var ein útbúgving í búskaparfrøði í Føroyum, eru nóg nógv fólk til ein flokk. 16 næmingar, sum tá, í februar, vóru seinasta árið í miðnámsskúla og ætlaðu sær at lesa búskaparfrøði, høvdu lisið í Føroyum, um til bar at taka útbúgvingina her.

Harafturat eru tíggju, sum helst høvdu tikið útbúgvingina í Føroyum. 62 av teimum 495 spurdu miðnámsskúlanæmingunum søgdu seg ætla at lesa búskaparfrøði.